ಕೊಡವಾಮೆ

ಪಂಡ್ ಅನಾದಿ ಕಾಲತ್ಂಜ ಇಲ್ಲಿಕೆತ್ತನೆ ನಂಗಡ ಕೊಡವಂಗ ಬದ್’ಕಿಯಂಡ್, ಬಾಳಿಯಂಡ್ ಬಂದ ಬಟ್ಟೆ ನೋಟ್’ನಕ ಅಯಿಂಗ ಪಟ್ಟ ಪಾಡ್, ಕಷ್ಟ, ನಷ್ಟ, ಅಯಿಂಗ ನೈಚಿತಂದ ಕೂಳ್ ನಂಗ ಇಂದ್ ಉಂಡಂಡ್ ಉಳ್ಳೊ ಎಣ್ಣಕ ತಪ್ಪಾಪಕಿಲೆ.
ನಾಗರೀಕತೆ ಇಲ್ಲತ ಅನಾಗರಿಕತೆರ ಕಾಲತ್ ಓರ್ ಬರೀಂಜಿ ಇಂಞೋರ್ ಬರಿಕ್ ಪೋಪಕ ನಡ್ಂದಿತೇ ಮಂಡೆಲೂ, ಬೆನ್ನಲೂ ಪೊರ್ತಂಡ್ ಪೋಪಯಿಂಜತಲೊ. ಇಂದ್ ನಂಗ ಎಚ್ಚಕ್ ಮಿಂಞಕ್ ಪೋಯಿತ್ ಎಣ್ಣಕ ಎಲ್ಲಿ ಆಚಂಗೂ ಪೋಂಡು ಎಣ್ಣಕ ಬಾರೀ ಬೆರಿಯ ಎತ್ತುವನ್ನತ‌ ವಾಹನತ್’ನ ಕಂಡ್ ಪುಡ್’ಚಂಡಿತ್. ಇನ್ನನೆ ನಂಗ ಇಂದ್ ಮಾಡಿಯಂಡ್ ಉಳ್ಳೊ ನಮ್ಮೆ ನಾಳ್’ಕ್ ಅಂದ್ ಒರಂದ್ ಕೇಳಿಂಗೀರ್ತಿ ಉಂಡ್. ಆಚೆಂಗಿ ನಂಗ ಇಂದ್ ಅದನೆಲ್ಲ ಪಾಳ್ ಮಾಡಿಯಂಡ್ ನಂಗಕ್ ಮನಸ್ಸ್’ಕ್ ಕುಷಿಬಂದನ್ನನೆ ಮಾಡಿಯಂಡ್ ಬರೀ ಮೋಜ್, ಮಸ್ತಿಕಾಯಿತ್ ಮಾಡಿತ್ ಎಣ್ಣುವಪೋಲೆ ನಡ್’ತಿಯಂಡ್ ಪೋಯಂಡುಂಡ್. ಅಕ್ಕು ನಂಗ ನಾಗರೀಕತೆಕ್ ಬರಂಡು ಕಾಲ ಬಂದನ್ನನೆ ಕೋಲಕಟ್ಟಿಯಂಡ ಪೋಂಡು ಆಚೆಂಗಿ ಆ ಪದ್ದತಿನ ಮನಸ್ಸ್’ಕ್ ಬಂದನ್ನನೆ ಬದಲ್ ಮಾಡಿಯಂಡ್ ನಂಗಡ ಕುಷಿಕ್, ತಮಾಷೆಕ್ ಮಾಡೊಕಾಗ. ನಂಗಡ ದೇವ ನೆಲೆ, ದೈವ ಮೂಲ ಇದನೆಲ್ಲ ನಂಗ ಮರ್’ಕತೆ ಅದಂಗ್ ಅದಂಡದೇ ನೇಮ ನಿರ್ಕ್’ಲ್ ಮಾಡಿಯಂಡ್ ಪೋನಕ ನಂಗಡ ಕೊಡಗ್ ಮಿಂಞತ್’ರ ಪೀಳಿಗೆಕ್ ಕೊಡಗಾಯಿತೇ ಉಳಿವ.