ಕೊಡವಾಮೆ
ಬೆಂದುವಳೆ ನಂಗ, ನಿಂಗಕೆಲ್ಲ ಗೊತ್ತಿಂಜ ಪೋಲೆ ಪಂಡ್ ನಂಗಡ ಅಜ್ಜ, ಮುತ್ತಜ್ಜಂಗ ಬಾಳಿ ಬದ್’ಕ್ ನೀಸಿಂಡ್ ಬಂದ ಕತೆನ ಇಕ್ಕ ಬದ್’ಕಿತುಳ್ಳೊ ನಂಗಡ ತಾತ,ಅವಯ್ಯಂಗಳ ಕೇಟಕ ಅಯಿಂಗ ಎಣ್ಣುವ ಕತೆ ನಂಗಕ್ ನೇರಾಯಿತು ಒರಮತೆ ಕೊಡಿಂಜಿ ತಡ್ ಬಡ್’ಚಿತ್ ಬೂಮಿಕ್ ಬುದ್ದಿತ್ ಬಾಯಿ ಬುಟ್ಟಪೋಲೆ ಆಯಿರುವ.
ನಂಗಡ ಕೊಡಗ್ ಪಶ್ಚಿಮ ಘಟ್ಟಕ್ ಕೂಡ್’ನ ಕುಂದ್, ಕಾಡ್, ಮರ, ಗ್’ಡ, ಬಳ್ಳಿ, ಮುಳ್ಳ್ ಇನ್ನತೆ ದುಂಬಾ ಕಷ್ಟತ್ ಇಂಜನ್ನತ ನಾಡ್’ಲ್ ನಂಗ ಇಂದ್ ಸುಕತ್ ಏದೇ ಕಷ್ಟ ಗೊತ್ತಿಲ್ಲತೆ ಓಡಿಕಳ್’ಚಂಡ್ ಉಂಡ್ ಎಣ್ಣಕ ನಂಗಡ ಪೆರಿಯಯಿಂಗ ನಂಗಕಾಯಿತ್ ಪಟ್ಟ ಪಾಡ್ ಅದ್. ಪಂಡ್ ನಾಗರೀಕತೆ ಇಲ್ಲತೆ ಅನಾಗರೀಕತೆ ಇಂಜ ಸಮಯತ್ ಪೈಪ ಕೆಲಕ್ ಎಂತಾಚಂಗು ದುಂಬ್’ಚಿಟ್ಟವಕ್ ಕಾಡ್-ಮಾಡ್’ಲ್ ನಡ್ಂದಿತೂ, ಒಡಿತೂ, ಪಾರಿತೂ ಅಲ್ಲಿ ಕಿಟ್ಟ್’ವನ್ನತ ಪಣ್ಣ್-ಪಲತ್’ನ ತಿಂದಂಡ್ ಕೊಲ್ಲಿ-ತೋಡ್’ಲ್ ನೀರ್ ಕುಡ್’ಚಂಡೂ ಬದಿಕಿ ಬಾತ್.
ನಾಕ್ ದಾರೋ ಒರ್ ತಾತ ಎಣ್ಣ್’ನದ್ ಗ್ಯಾನಾಪ ಪಂಡ್ ಬೇಲ್, ಬಾಣೆ ಗೋರಿತ್ ಬೊಳೆ ಬೊಳಿವಕ್ ಇಕ್ಕತ್’ರ ಮಾದ್ರಿ ಗುದ್ದಲಿ, ಪಿಕಾಸಿ ಇನ್ನತ ಆಯುದತ್ರ ಬಳಕೆ ಇಲ್ಲತಿಪ್ಪಕ ತಂಗಡ ಕೈ ಕಾಲ್’ರ ಒಯಿಲ್ ಮಾಂದಿತ್ ಬೇಲ್, ಬಾಣೆ ಗೋರಿತ್ ನಾಟಿ ಮಾಡಿತ್ ಬೊಳೆ ಬೊಳ್ಂದಿತ್ ಕೂಳುಂಬ ಕಾಲ ಇಂಜತಲೊ. ಆಚೆಂಗಿ ನಂಗಕ್ ಅದೆಲ್ಲ ಗೊತ್ತಾಪುಲೆ ನಂಗಕ್ ಎಕ್ಕ ಏರ ಪಣ ಕೈಯಿಕ್ ಬಾತೋ ನಂಗಡ ಕಳಿಯೇ ಬದಲಾಪ. ನಂಗ ಉಂಬ ಕೂಳ್’ರ ಬಗೆಲ್ ಪರಿವಕ ನಾಕ್ ಒಂದ್ ಎಳ್ದಂಡೂಂದ್ ಆಪ ನಂಗ ಕೆಲ ಪೈಚಕ ಪೋಯಿತ್ ಕೂಳ್ ಇಟ್ಟಂಡ್ ಉಂಬ.
ಅದಿಯಾನನ ಎಡ್’ತ ಪೋಯಿತ್ ಚಾಡುವ ಅದೇ ನಂಗಕ್ ಕೆಲ ಪೈಪಕ ಕೂಳ್ ಉಂಡಕ ಸಮದಾನ ಆಪೋ ಆ ಕೂಳ್ ನಂಗಡ ಕೆಲಕ್ ಬಂದಿತ್ ಬೂವಂಡೆಂಗಿ ಕಮ್ಮಿ ಎಣ್ಣಕಲೂ 125 ನಾಳ್ ಬೋಂಡು ನಂಗಡ ರೈತಂಗ ಅಚ್ಚಕ್ ದಿನ ಬೇಲ್ ಉತ್ತಿತ್, ತಯಿಚಿತ್, ನಾಟಿ ನೆಟ್ಟಿತ್, ಕಳೆ, ಗೊಬ್ಬರ, ಕೊಯಿಪಣಿ ಎಲ್ಲ ಮಾಡಿತ್ ಪೋವುಲೂ, ಇರ್’ಲೂ ಕಷ್ಟಪಟ್ಟ್ ನೈಚಿತ್ ತಪ್ಪ ಕೂಳ್’ನ ನಂಗಕ್ ಎಚ್ಚಕ್ ಬೋಂಡು ಅಚ್ಚಕ್ ಇಟ್ಟವತೆ ಉಂಡಿತ್ ಬಾಕಿ ಆನನ ಎಡ್’ತ ಪೋಯಿತ್ ಚಾಡುವ. ನಾನ್ ಎನ್ನಂಗ್ ಇದನ ಎಣ್ಣಿನಾ ಎಣ್ಣಕ ನಂಗಡ ಅಜ್ಜ , ಮುತ್ತಜ್ಜಂಗ ಪಂಡ್ಂಜೇ ರೈತಂಗಳಾಯಿತ್ ಬೇಲ್’ಲ್ ನೆಲ್ಲ್, ಪಿಲ್ಲ್ ಬೊಳಂದಿತ್ ನಂಗಕ್ ಇಂದತ್’ರ ನಲ್ಲ ಬದ್’ಕ್’ಕ್ ಬುಟ್ಟಿತ್ ಪೋಯಿತ್. ಅನ್ನನೆ ಕಷ್ಟಪಟ್ಟಿತ್ ಕಳ್’ತಿತೂ, ಗೋರಿತೂ, ಕೈ ಕಾಲ್ ನೊಂಬಲ ನುರಿ ಮಾಡಿಯಂಡ್ ಉಳ್’ತಿ ತಂದ ಬೇಲ್’ನ ನಂಗ ಕಾಫಿ, ಮಳು ತೋಟ ಪಿಂಞ ಲೇಔಟ್ ಮಾಡಿತೂ…ಜಾಗ ಮಾರಿತೂ ಪಾಳಾಕಿಯಂಡ್ ಪೋಯಂಡುಂಡ್.
ಅಂದ್ ನಂಗಡ ಪೆರಿಯಯಿಂಗ ರೈಂತಂಗಾನಂಗ್ ನಂಗ ಇಂದ್ ಉಂಬಕ್ ಕೂಳ್ ಕಿಟ್ಟಿಯಂಡ್ ಉಂಡ್. ಇಕ್ಕತ್’ರ ಜನ ಎನ್ನನಾಯಿತ್ ಎಣ್ಣಕ ರೈತಂಗ ಎಣ್ಣಕ ಅವೊನ ದೂರ ತೆರ್ಕಿಬೆಪ್ಪಕ್ ನೋಟುವ. ಇದ್ ಆಗ ನಂಗಕ್ ನಂಗಡ ಪೆರಿಯಯಿಂಗ ಬುಟ್ಟ್’ಪೋಯಿತ್ ನಂಗಳೂ ನಂಗಡ ಮಕ್ಕ, ಮರಿಮಕ್ಕಕ್ ಬುಟ್ಟಿತ್ ಪೋಂಡು ಇಲ್ಲೆಂಗಿ ಮಿಂಞಕ್ ನಂಗಕ್ ಚತ್ತಲ್ಲಿಯೂ ನೆಮ್ಮದಿರ ನೆಲೆ ಕಿಟ್ಟ್’ವಕಿಲ್ಲೆಂದ್ ನಾಡ ಅಬಿಪ್ರಾಯ. ಎಣ್ಣಿಯಂಡ್ ಇಂದೆತ್’ರ ಕಾರ್ಬಾರ್ ಇಲ್ಲಿಕ್ ತೀತಂಡ್ ಉಳ್ಳೊ. ಎಳ್ದ್’ನ ಎಳ್ತ್’ಲೂ ತಂದ ಅರಿವಿಕೆಲೂ ಎನ್ನೇಂಗಿ ತಪ್ಪು-ನೆಪ್ಪು ಇಂಜಕ ಅರಿವಿಕೆ ತಂದಿತೂ, ತಿದ್ದಿತೂ, ಬುದ್ದಿಎಣ್ಣಿತೂ ಎಲ್ಲಾರು ಕೂಡಿತ್ ಕೊಡವಾಮೆನ ಕೊಂಡಾಡನಾಂದ್ ಕೇಟವಿ.
