ಕೊಡವ’ ಎಣ್ಣ್’ಚೆಂಗಿ…
ಕೊಡಗ್ ಎಣ್ಣ್’ವದ್ ಒರ್ ವಿಶಿಷ್ಟ ಪದ್ದತಿ, ಪರಂಪರೆ, ಆಚಾರ, ವಿಚಾರ, ಬಟ್ಟೆ, ಬರೆ ಉಳ್ಳಂನ್ನತ ಒರ್ ಚೆರಿಯ ಜಿಲ್ಲೆ. ಇದ್ ಚೆರಿಯ ಜಿಲ್ಲೆ ಆಚಂಗೂ ಕೂಡ ಪ್ರಪಂಚ ಮಟ್ಟತ್ ಕೇಳಿ ಪಡ್ಂದಂತ ಜಿಲ್ಲೆ ಆಯಿತುಂಡ್. ಕೊಡಗ್’ರ ಜನ ಎಲ್ಲಾ ತರತ್’ರ ಕೋವುಲೂ ನಲ್ಲೊಣೆ ನೈಚಿತ್ ಜಿಲ್ಲೆಕ್ ಪೆದ ಕೊಂಡಬಂದಿತ್. ಜನ ಸಂಖೆಲ್ ಚೆರಿಯ ಜಿಲ್ಲೆ ಆಚಂಗೂ ಸುಮಾರ್’ಕ್ ಒರಂದ್ ಊರ್’ಲ್ ಪಾದಿಕ್ ಪಾದಿ ಮನೆಲ್ ಒರಬಡನ್ನಕೆ ದೇಶ ಸೇವೆ ಮಾಡೊಕ್ ಪಟ್ಟಾಳ ಕಾರಂಗಾಯಿತ್ ನೈಚಿತ್,ನೈಚಂಡೂ ಉಂಡ್.
ಜನರಲ್ ಕೊಡಂದೇರ ಕಾರ್ಯಪ್ಪ ಅಜ್ಜ, ಜನರಲ್ ಕೊಡಂದೇರ ತಿಮ್ಮಯ್ಯ ಅಜ್ಜಂಡಂತೈಂಗ ಮಾಡ್’ನ ಸಾದನೆ ಇಂದೆಕೂ ಅನ್ನನೇ ಸೂರಿಯ, ಚಣ್ಣೂರ ಇಪ್ಪಲ್ಲಿಕೆತ್ತನೆ ನೆನತಿಯವನ್ನತ ಸಾದನೆ ಮಾಡಿತ್. ನಂಗಡ ಈ ಕೊಡಗ್’ಲ್ ಬೋರೆ ಬೋರೆ ಜಾತಿರ ಜನಾಂಗ ಕಾರಂಗ ಒಗ್ಗಟ್ಟ್ ಒತ್ತೊರ್ಮೆಲ್ ನಾಳಿ ಬದಿಕಿಯಂಡ್ ಪೋಯಂಡುಂಡ್. ಆಚೆಂಗಿ ನಂಗ ಕೊಡವಂಗಡ ವಿಭಿನ್ನ ವಾನ ಬಟ್ಟೆ- ಬರೆ, ನಮ್ಮೆ-ನಾಳ್, ಆಚಾರ-ವಿಚಾರ, ಪದ್ದತಿ-ಪರಂಪರೆ ಕೊಡಗ್ ಬುಟ್ಟಕ ಇಡೀ ವಿಶ್ವತ್’ಲೇ ನಿಂಜಕ್ ಬೋರೆ ಕಡೆ ಕಾಂಬಕ್ ಸಾದ್ಯ ಇಲ್ಲೆ. ನಂಗ ಒರ್ ನಲ್ಲ ಕಾರ್ಬಾರ್ ಆಡ್ ಕೆಟ್ಟ ಕಾರ್ಬಾರ್ ಆಡ್ ಪ್ರಪಂಚತ್ ಏದೇ ಜನಾಂಗಕಾರಳೂ ಮಾಡತ್ರನ್ನನೆ ವಿಭಿನ್ನ ರೀತಿಲ್ ಇಪ್ಪ ಮಂಗಲ, ಮಾದ, ಚಾವು ನಮ್ಮೆ ಇನ್ನತ ಎಲ್ಲಾ ಕಾರ್ಬಾರ್’ನೂ ಪೆರ್ತ ಚಾಯೋಡೆ ಕೈಪದ್ ನಡ್ಂದ್ ಬಂದಿತ್. ಕೊಡವಂಗ ಪಂಡ್ಂಜೇ ನಂಗಡ ಅಜ್ಜಂಡಜ್ಜಂಗ ಸೌರ್ಯ, ಸಾಹಸ, ಕಳಿ, ಇನ್ನನೆ ಎಲ್ಲಾ ರೀತಿಲೂ ಒರ್ ಕೈ ಮಿಂಞಲ್ ನಿಂದಿತಿಪ್ಪ. ಕೊಡಗ್’ರ ಪಿಂಙೋರ್ ವಿಶೇಷತೆ ಎಣ್ಣಕ ಪಂಡ್ಂಜೆ ನಂಗಕ್ ಜಮ್ಮ ಆಸ್ತಿರ ಹಕ್ಕ್ ಪಡಂದಿತುಂಡ್. ಅನ್ನನೇ ತೋಕ್’ರ ಹಕ್ಕೂ ಪಡ್ಂದಂಡಿತ್‌. ಇನ್ನನೆ ಎಲ್ಲಾ ಕೋವುಲೂ,ಎಲ್ಲಾ ಪದ್ದತಿ, ಪರಂಪರೆಕ್ ಕೇಳಿ ಪೋನ ನಾಡ್ ಎಣ್ಣಕ ಕೊಡಗ್ ಎಣ್ಣ್’ನಕ ತಪ್ಪಾಪಕಿಲ್ಲೆ.
ಬಾಕಿ ಬಪ್ಪ ವಾರ ಕೊಡವಡ ಬಗ್ಗೆ ಇಂಙಚ್ಚಕ್ ವಿವರಣೆ ತಪ್ಪಿ. ಕಾತಳ್ತಿತಿರಿ.
✍️ಅಜ್ಜಮಕ್ಕಡ ವಿನು ಕುಶಾಲಪ್ಪ
